መልክዐ ማርያም

ሰላም ለኅንብርቲኪ ከመ ማዕከክ ርእየቱ፡ ዘኢየዓርቅ እምቱስሕቱ፡ ማርያም ድንግል ለካህን ዕፀ ኅርየቱ፡ ከመ ኢይኩን ፅሩዐ ንባበ አፍየ ዝንቱ፡ በጽዋዐ ኪሩብ ደዩዮ ወሡጢዮ ሎቱ።

ሰላም ለማኅፀንኪ ለእግዚአብሔር ማኅፈዱ፡ ዘሐነፀኪ የማነ እዱ፡ ማርያም ድንግል ማዕዝት ዘእምናርዱ፡ ኅቤኪ ያንቀዐዱ ለረኪበ ኩሉ ምፍቅዱ፡ ምስለ ካልኡ ዐይንየ አሐዱ።

ሰላም ለማዕፀንኪ ለእግዚአብሔር ዘውጉ፡ ብዑድ ሥርዐቱ ወፍሉጥ ሕጉ፡ ማርያም ድንግል ለአስካለ ሕይወት ሐረጉ፡ በልኒ እግዝእትየ ኃጢአተከ ኅደጉ፡ ወመኃልየከ ስማየ አዕረጉ።

ሰላም እብል ለድንግልናኪ ዕፅው፡ እንተ እምኔሁ ሠረቀ ፀሐየ መለኮት ኅትው፡ ማርያም ድንግል ዘሥነ ንጽሕኪ ፍትው፡ ለኅዲር በበፍናዉ በአህጉር ወበድው፡ ዕቀብኒ ወለቶሙ ለኄራን አበዉ።

ሰላም ለሐቌኪ በትረ ሌዋዊ ሣዉዕ፡ ዘኢሐፀነኪ ጠል ወዘኢሠቀየኪ ነቅዕ ፡ ማርያም ድንግል እግዝእተ መላእክት ወሰብእ፡ ሰድኒ ብሔረ ፍግዕ በትንባሌኪ ባቍዕ፡ ምስለ ኅሩያንኪ  ደርገ አሃሉ በስንዕ።

ሰላም ለአቍያጽኪ እለ ይነብራ ድርገተ፡ እምነ አብራክኪ ላዕለ ወእምነ ሐቌኪ ታሕተ፡ ማርያም ድንግል እንተ ኢተአምሪ ርስሐተ፡ ጽባሐ ወምሴተ ኩሎ ዕለተ፡ ዘይስማዕ ምሕረተኪ ግበሪ ሊተ።

ሰላም ለአብራክኪ በስብሐተ ልዑል ዘአስተብረካ፡ እምአመ ወሀቡኪ ብፅዐ ውስተ ኦሪታዊት ታዕካ፡ ማርያም ድንግል መንበር ዘአብነ ፔካ፡ ግዜ ስደቶሙ ለኃጥአን እምዐፀደ ዐባይ ፋሲካ፡ ፄውዉኒ መንገሌኪ እኩንኪ ምህርካ።

 ሰላም ለአእጋርኪ እለ ፃመዋ በረዊፅ፡ እምቤተ ልሔም ዘይሁዳ እስከ ምድረ ግብጽ፡ ማርያም ድንግል ሥርጉተ ነበልባል ዕፅ፡ ለኅዲር በቤተ ናሕስ እንተ መልዕልተ ኰኩሕ ህኑጽ፡ አጥብብኒ በተግሣፅ ወሡቅኒ እምዳኅፅ።

ሰላም እብል ለዘዚአኪ ሰኰና፡ ዘኢድኅፀ በውስተ ፍና፡ ማርያም ድንግል ትእምርተ ኪዳን ቀስተ ደምና፡ አምዕዝኒ በዕፍረትኪ ወጸግውኒ ጥዒና፡ በከመ ትገብር እም ለንኡስ ሕፃና።

ሰላም ለመከየድኪ እለ ረከቦን መከራ፡ እምፍርሃተ ቀተልት ሐራ፡ እንበለ አሣእን አመ ሖራ፡ ማርይም ድንግል ታቦተ ቃለ ጽድቅ መንፈቀ ዕሥራ፡ ዕጐላት እምዕጐሊሆን ከመ ኪያኪ አፍቅርኒ አፍቀርኩኪ  እምይእዜ ለግሙራ።

 ሰላም እብል ዘአእጋርኪ አፃብዐ፡ ሐሳበ ኁልቆን ዘኮነ ምስለ ስድስ ርብዐ፡ ማርያም ድንግል ዘተሰመይኪ ምሥዋዐ፡ በረዊፅ ወብጉጉአ አፍጥኒ መጺአ፡ ሶብ አፋየ ስመኪ ጸውዐ።

 ሰላም ለአፅፋረ እግርኪ ዘኢፈቀዳ ለሥርጋዌ፡ ጥምዐታተ ሕምር ምድራዌ፡ ማርያም ድንግል ሐውልተ ስምዕ ዘወልደ ነዌ፡ ሡቅኒ እምትንታኔ ወባልሕኒ እምአርዌ፡ ላዕለ እምየ ዘአምጽአ ደዌ።

ሰላም ለቆምኪ በቀልተ ዘተመስለ፡ ኅበ ሙኅዘ ማይ ዘበቈለ፡ ማርያም ድንግል እስእለኪ ስኢለ፡ ኢይረድ ታሕቲተ ምጥቅኒ ላዕለ፡ ኢረከብኩ በርኅራኄ ከማኪ ዘብዕለ።

ሰላም ለመልክዕኪ ዘተሠርገወ አሜረ፡ ዘያበርህ ወትረ፡ ፍቅርትየ አንቲ እንተ ታበድሪ ፍቅረ፡ አርእይኒ ገጸ ዚአኪ ማርያም ምዕረ፡ ዘኢይሰምዖ ካልእ እንግርኪ ነገረ።

ሰላም ለፀአተ ነፍስኪ እንበለ ፃዕር ወፃማ፡ ለነቢር ዘልፈ በየማነ ወልድኪ ፌማ፡ ማርያም ድንግል ክልልተ ሞገሰ ወግርማ፡ አጽንዒ በረድኤትኪ ለሕይወትየ ድካማ፡ እምሕይወተ ኄራን አበው ኢታሕጽጺ ዐቅማ።

ሰላም ለሥዕርተ ርእስኪ ዘተንእደ ፅፍሮሁ ለአቡኪ በከናፍሪሁ። 

ማርያም ድንግል ለእግዚአብሔር ጽርሑ

ለገብርኪ እግዝእትየ ኢትኅድግኒ እላሑ። 

ከመ ኢይበሉኒ ፀር አይቴኑሙ ምክሑ።

ሰላም ለርእስኪ በቅብዐ ቅዳሴ ርሑስ አኮ አኮ በቅብዕ ደነስ።  

ማርያም ድንግል ንጽሕተ ሥጋ ወነፍስ። 

ያንጽሐኒ እምነ ርኵስ በፍሕመ ቁርባኑ ቅዱስ።

አዝዚዮ ለሱራፌ ዘሰማይ ቀሲስ። 

ሰላም ለገጽኪ ዘጥቀ ይልሂ።  እምስነ (እምነ) ከዋክብት ወወርኅ ወእምስነ ፀሐይ መብርሂ። 

ማርያም ድንግል ፍናዋትየ ሠርሂ

በመዓልት ወበሌሊት ኢይርከበኒ ጸናሒ።

መሥገርተ አበሳ ዘይጠፍር ወግበ ዘይድሂ። 

ሰላም ለቀራንብትኪ ደመናተ ብካይ እለ ኮና።  አመ አሕመመ ወልደኪ ቅንአተ ቀያፋ ወሐና። 

ማርያም ድንግል ለባሲተ ንጽሕ ወቅድስና። 

አስምዕኒ ነገረ ጽድቅ ዘያስተፌሥሕ ሕሊና። 

ከመ አስተፍሥሐኪ ጥቀ ዘመልአክ ዜና።

 ሰላም ለአዕይንትኪ ዘተመሰላ ኣብያዘ።  እለ ይፈጽማ ትእዛዘ።  ማርያም ድንግል እንተ ኢተኣምሪ ጋእዘ።  ናዝዝኒ በንባብኪ እመ ልብየ ተከዘ።  በሐብለ ሰቆቃው ጽኑዕ ኢይኩን እኁዘ።

ሰላም ለአዕዛንኪ እለ ሰምዓ ቃሎ እግዚአብሔር እግዚእ ሶበ ለገብርኤል ተመሰሎ። ማርያም ድንግል  ጽሕቅት ለተሣህሎ ሶበ ለልብየ እሳተ ኅዘን አሕለሎ ያጽምዓኒ እላ ነገርየ ኩሎ።

ሰላም ለመላትሕኪ በእሳተ አንብዕ እለ ዉዕያ ጊዜ ሰቀሉ በኩረኪ ውሉደ ራሔል ወልያ። ማርያም ድንግል ለነፍስየ ደብረ ምስካያ አድኅንኒ እምአፈ ደም ዘአናብስተ ሐቅል አርአያ ከመ ማሕፈር ጠቢብ ወምእመን ኬንያ።

ሰላም ለአዕናፍኪ መሳክወ ሰናይ መዐዛ ይኄይስ ፈድፋደ እምፄና ስሂን ዘጠረጴዛ።     ማርያም ድንግል ለሕይወትየ ምርጉዛ ሰዋስው ዘምድረ ሎዛ እንተ ርእየኪ ወሬዛ አመ ዕለተ ፍዳ ኩንኒ ቃውመ ወቤዛ።

ሰላም ለከናፍርኪ ከመ ፍሕሶ ቀይሕ ሥርጉተ ቅዳሴ ወንጽሕ።  ማርያም ድንግል ኆኅተ ጽባሕ። ባልሕኒ እምነ ወይሌ ወአንግፍኒ  እምላሕ። እስመ ለልብየ ኅዘኑ ብዙኅ።

ሰላም ለአፉኪ ዘሰዐመ ርስነ። እንዘ አበ አዕሩግ ውእቱ በጊዜ ኮነ ሕፃነ። ማርያም ድንግል ዘትፄንዊ ስኂነ። ኀፍረተ አበሳ ሶበ ገጽየ ተከድነ ለናዝዞትየ እሙ ብጽሒ ፍጡነ።

ሰላም ለአስናንኪ  ሐሊበ ዕጐልት ዘተዛወጋ። ወመራዕየ ቅሩፃተ እለ እምሕፃብ ዐርጋ። ማርያም ድንግል ለደብተራ ስምዕ ታቦተ ሕጋ። አፍቅርኒ እንበለ ንትጋ ለብእሴ ደም ወሥጋ። ዘየዐቢ እምዝ ኢየኅሥሥ ጸጋ።

ሰላም ለልሳንኪ ሙኅዘ ሐሊብ ወመዓር። ዘተነብዮ ወፍቅር (በፍቅር)። ማርያም ድንግል ወለተ ድኁኃን አድባር። ኅብእኒ እምዐይነ ፀር ወአንጽሕኒ እምነውር። እስመ ተስፋየ አንቲ በሰማይ ወምድር።

ሰላም ለቃልኪ እምአስካለ ወይን ጥዑም። ወእምድምፀ ናብሊስ አዳም ዘያረስዖ ለሕማም። ማርያም ድንግል ዘብርሃነ ሕይወት ተቅዋም። እመ ተሀውከ በላዕልየ (ላዕልየ) ማዕበል ዝንቱ ዓለም። ከመ ያርምም ገሥፂዮ መሐሪት እም።

ሰላም ለእስትንፋስኪ ዘመዓዛሁ ሕይወት። ከመ መዐዛ ዕፅ ኅሩይ ዘውስተ ገነት። ማርያም ድንግል ቤተ ቅድሳት። ጽንሕኒ ውስተ ሠናይት ወሠውርኒ እሞት። በአክናፍኪ ርግብየ ኅሪት።