መልክዐ ማርያም

ሰላም ለአዕዛንኪ እለ ሰምዓ ቃሎ እግዚአብሔር እግዚእ ሶበ ለገብርኤል ተመሰሎ። ማርያም ድንግል  ጽሕቅት ለተሣህሎ ሶበ ለልብየ እሳተ ኅዘን አሕለሎ ያጽምዓኒ እላ ነገርየ ኩሎ።

ሰላም ለመላትሕኪ በእሳተ አንብዕ እለ ዉዕያ ጊዜ ሰቀሉ በኩረኪ ውሉደ ራሔል ወልያ። ማርያም ድንግል ለነፍስየ ደብረ ምስካያ አድኅንኒ እምአፈ ደም ዘአናብስተ ሐቅል አርአያ ከመ ማሕፈር ጠቢብ ወምእመን ኬንያ።

ሰላም ለአዕናፍኪ መሳክወ ሰናይ መዐዛ ይኄይስ ፈድፋደ እምፄና ስሂን ዘጠረጴዛ።     ማርያም ድንግል ለሕይወትየ ምርጉዛ ሰዋስው ዘምድረ ሎዛ እንተ ርእየኪ ወሬዛ አመ ዕለተ ፍዳ ኩንኒ ቃውመ ወቤዛ።

ሰላም ለከናፍርኪ ከመ ፍሕሶ ቀይሕ ሥርጉተ ቅዳሴ ወንጽሕ።  ማርያም ድንግል ኆኅተ ጽባሕ። ባልሕኒ እምነ ወይሌ ወአንግፍኒ  እምላሕ። እስመ ለልብየ ኅዘኑ ብዙኅ።

ሰላም ለአፉኪ ዘሰዐመ ርስነ። እንዘ አበ አዕሩግ ውእቱ በጊዜ ኮነ ሕፃነ። ማርያም ድንግል ዘትፄንዊ ስኂነ። ኀፍረተ አበሳ ሶበ ገጽየ ተከድነ ለናዝዞትየ እሙ ብጽሒ ፍጡነ።

ሰላም ለአስናንኪ  ሐሊበ ዕጐልት ዘተዛወጋ። ወመራዕየ ቅሩፃተ እለ እምሕፃብ ዐርጋ። ማርያም ድንግል ለደብተራ ስምዕ ታቦተ ሕጋ። አፍቅርኒ እንበለ ንትጋ ለብእሴ ደም ወሥጋ። ዘየዐቢ እምዝ ኢየኅሥሥ ጸጋ።

ሰላም ለልሳንኪ ሙኅዘ ሐሊብ ወመዓር። ዘተነብዮ ወፍቅር (በፍቅር)። ማርያም ድንግል ወለተ ድኁኃን አድባር። ኅብእኒ እምዐይነ ፀር ወአንጽሕኒ እምነውር። እስመ ተስፋየ አንቲ በሰማይ ወምድር።

ሰላም ለቃልኪ እምአስካለ ወይን ጥዑም። ወእምድምፀ ናብሊስ አዳም ዘያረስዖ ለሕማም። ማርያም ድንግል ዘብርሃነ ሕይወት ተቅዋም። እመ ተሀውከ በላዕልየ (ላዕልየ) ማዕበል ዝንቱ ዓለም። ከመ ያርምም ገሥፂዮ መሐሪት እም።

ሰላም ለእስትንፋስኪ ዘመዓዛሁ ሕይወት። ከመ መዐዛ ዕፅ ኅሩይ ዘውስተ ገነት። ማርያም ድንግል ቤተ ቅድሳት። ጽንሕኒ ውስተ ሠናይት ወሠውርኒ እሞት። በአክናፍኪ ርግብየ ኅሪት።

ሰላም ለጕርዔኪ ሠናይ እምወይን። በከመ ይቤ ሰሎሞን። ማርያም ድንግል ለባሲተ ዐቢይ ብርሃን። ክድንኒ ገርዜነ ጸጋ ኢያዕጽብኒ ዕርቃን። ዘኢአነምዎ ጠቢባን በኪን።

ሰላም ለክሣድኪ ቃማ ንጹሕ ዘዐነቀ። ከመ አዋልድ አኮ ብሩረ ወወርቅ። ማርያም ድንግል ዘተመሰልኪ ማዕነቀ። ሕይወትየ በንዝህላል እመ ተሰልጠ ወኅልቀ። ወስክኒ ክራማተ እስከ እገብር ጽድቅ።

 ሰላም ለመታክፍትኪ እለ ግኁሣት እማንቱ፡ ለጌጋይ እምነ አርዑቱ፡ ማርያም ድንግል ለሆሤዕ ሠርጐ ትርሲቱ፡ በልኒ እግዝእትየ ጸሕቀ ሕሊናየ ዝንቱ፡ ፍኖተ የማን ይምራሕከ ወተአኰት ቦቱ።

ሰላም ለዘባንኪ እምዘባነ ኪሩብ ዘዐብየ፡ ሐዚሎ እሳተ ወእምርስነ ነዱ ኢዉዕየ፡ ማርያም ድንግል ፈጻሚተ ኩሉ ጻሕቅየ፡ ሀብኒ እግዝእትየ ዘተመነይኩ ሠናየ፡ እንበለ አፅርዖ ፍጡነ በጺሐኪ ዝየ።

ሰላም ለእንግድዓኪ ለእሳተ መለኮት ምርፋቁ፡ ዘይቀድስ ነፍሰ ወያጥዒ ሞቁ፡ ማርያም ድንግል ለነዳይ ንዋየ ወርቁ፡ እመ ነገደ ርኅቀ ወሖረ ዕራቁ፡ ኢያኅዝኖ ሲሳይ እስመ አንቲ ስንቁ።

 ሰላም ለኅፅንኪ ለጥበበ ሰማይ ምዕራፋ፡ ዘኢትረከብ ሱታፋ፡ ማርያም ድንግል ጸጋዊተ ሰላም ወተስፋ፡ ኩንኒ እግዚእተየ ቅድመ ፀርየ ሐገፋ፡ ከመ ዖፍ አፍኅርቲሃ ትሤዉር በክንፋ።

ሰላም ለአእዳዉኪ እሳተ መለኮት እለ ገሠሣ፡ አውቃፈ ብሩረ ወወርቅ ለሥርጋዌሆን ኢኅሠሣ፡ ማርያም ድንግል ለመካን ህንባበ ከርሣ፡ አንጽሕኒ እግዝእትየ ለፍትወተ ዓለም እምርኩሳ፡ በዲበ ሥጋየ ኢትንበር ነጊሣ።

ሰላም ለመዛርዕኪ ዘተረሰያ ኃይለ፡ ከመ ይፁራ ነበልባለ፡ ማርያም ድንግል እንተ ኅጣእኪ መምሰለ፡ ኃጢአትየ ለገብርኪ ከመ ፈድፈደ ተለዐለ፡ ከመ ጥቅም ዘባቢል ረስዩ ንኁለ።

ሰላም እብል ለኩርናዕኪ እዌድሶ፡ ለእሳተ መለኮት በላዒ አምጣነ ኮነ ትርአሶ፡ ማርያም ድንግል ምዕዝት ምግባር ዘእምአንክሶ፡ ህልዊ ደርገ ምስሌየ እንዘ አልብኪ ተግኅሦ፡ ለሕሊና ልብየ ወትረ እንግርኪ ማኅሠሣ።

 ሰላም ለእመታትኪ እለ ጸንዓ ይፍትላ፡ ሜላተ ወወርቀ በናዝሬት ወበገሊላ፡ ማርያም ድንግል ለዮዲት ጥበበ ቃላ፡ ብጽሒ በሠረገላ ንትመሐል መሐላ፡ ከመ ታኅድርኒ በብሔር ዘተድላ።

 ሰላም ለእራኃትኪ እለ ስፋሐት ለመጥዎ፡ ስቴ መድሃኒት ጽሩይ ወእክለ ኣህይዎ፡ ማርያም ድንግል እስእለኪ በተስፋዎ፡ ከመ እክሀል በበ ፆታሁ ስብሐታተኪ ዜንዎ፡ ለገብርኪ ዓብድ ምልእኒ ለብዎ።

ሰላም ለአፃብዕኪ እምእራኃ እዴኪ እለ ሠረፃ፡ እምኁልቈ ሠላሳ ወስብዕ እንዘ ኢየሐፃ፡ ማርያም ድንግል ደብረ ኤልያስ ነቢየ ፋጻ፡ ዕቀብኒ በረድኤትኪ እምነ እርዌ ዘኆፃ፡ ህየንተ ሠናይ ለሰብእ ዘይሁብ ዐመፃ።

ሰላም ለአፅፋረ እዴኪ መልዕልተ አፃብዕ እለ ሠረቃ፡ በበሕቅ ዘልፈ እንዘ ይልኅቃ፡ ማርያም ድንግል ማኅቶትየ በውስተ ጣቃ፡ ኢትሰድኒ ለገበርኪ ለዓመትየ በንፍቃ፡ ዝንቱ ውእቱ ለልብየ ጻሕቃ።

ሰላም ለአጥባትኪ እለ አውኃዛ ፍጽመ፡ ድንግልናዌ ሐሊበ ዉስተ አፈ አምላክ ቅድመ፡ ማርያም ድንግል እንተ አምጻእኪ ሰላመ፡ ኅጽንኒ በኣጥባትኪ ለእመኮንኩ ደክታመ፡ ዘእንበሌኪ ኢየኅሥሥ እመ።

ሰላም ለገቦኪ ዘሐመልማለ ወርቅ ክዳኑ፡ በከመ ዳዊት ይዜኑ፡ ማርያም ድንግል ለያዕቆብ ሞገሰ ሥኑ፡ በልኒ እግዝእትየ አፈቅረከ አኮኑ፡ እንዘ ረዳኢትከ አነ ዘይክለከ መኑ።

ሰላም ለከርሥኪ ዘአፈድፈደ ተበፅዖ፡ እምታቦተ ሙሴ ነቢይ ለጽሌ ትእዛዝ ዘየኅብኦ፡ ማርያም ድንግል ጊዜ ጽዋዕኩኪ በአስተብቍዖ፡ ለፀርየ ብእሴ ዐመፃ ኃይለ ዚአኪ ይጽብዖ፡ እስከነ ያስቆቁ ጥቀ ድኅሪተ ገቢኦ።

ሰላም ለልብኪ እምነ በቀል ርኅቅ፡ እምጥነ ዐረብ ወሠርቅ፡ ማርያም ድንግል ገነት ኅሩያን ደቂቅ፡ ክድንኒ ልብሰ ከብካብ ለቅኑይኪ ዕሩቅ፡ ከመ ጶደሬ ጽጌሁ ዘወርቅ።

 ሰላም እብል ለኩልያትኪ ክልኤ፡ ዘቅብዐ ክህነት ቀርን ወዘወይነ ትፍሥሕት ግምዔ፡ ማርያም ድንግል በልኒ ቅድመ ጉባኤ፡ ሕፃንየ በእንቲአየ ይከዉነከ ረዳኤ፡ እመራደ ፀርከ ሕቀ ኢትፍራህ ትንሣኤ።

ሰላም ለሕሊናኪ ሐልዮ ሠናያት ልማዱ፡ ወገቢረ ምሕረት መፍቅዱ፡ ማርያም ድንግል ለዳዊት ወለተ ወልዱ፡ ንዝሕኒ በአዛብኪ ዘይትረከብ ዘመዱ፡ ወበማየ ሕይወት ሕፀብኒ እምበረደ እፃዕዱ።

ሰላም ለአማዑትኪ ነበልባለ ኅዘን ዘአውዐየ፡ እመ ወዐለ ወልዲኪ ስቄለ በቀራንዮ፡ ማርያም ድንግል ፀምረ ጠለ ዘተነበዩ፡ ጌጋይየ አስተርአዮ እንተ አልብኪ ተፈልዮ፡ በሥርዐተ ካህን ላዕሌየ አንኂ ጸልዮ።

ሰላም ለንዋየ ዉሥጥኪ አምሳለ ንዋያ ለደብተራ፡ ስብሐተ ልዑል ዘይሤዉራ፡ ማርያም ድንግል ትምክሕተ ደቂቃ ለሣራ፡ ባልሕኒ ወለተ ቅስራ ለዓለመ ጽልመት እምፃዕራ፡ እስመ መቅዓን ወጠዋይ ምሕዋራ።

 ሰላም ለንዋየ ውሥጥኪ አምሳለ ብዋያ ለመቅደስ፡ ንዋይኪሰ ኢየሱስ ክርስቶስ፡ ማርያም ድንግል ዘገዳመ ሲና ጳጦስ፡ ከመ ያነቅሖ ለልበ ዘፋኒ ናብሊስ፡ ፍቅርኪ ያንቅሐኒ በሥጋ ውነፍስ።

ሰላም ለኅንብርቲኪ ከመ ማዕከክ ርእየቱ፡ ዘኢየዓርቅ እምቱስሕቱ፡ ማርያም ድንግል ለካህን ዕፀ ኅርየቱ፡ ከመ ኢይኩን ፅሩዐ ንባበ አፍየ ዝንቱ፡ በጽዋዐ ኪሩብ ደዩዮ ወሡጢዮ ሎቱ።

ሰላም ለማኅፀንኪ ለእግዚአብሔር ማኅፈዱ፡ ዘሐነፀኪ የማነ እዱ፡ ማርያም ድንግል ማዕዝት ዘእምናርዱ፡ ኅቤኪ ያንቀዐዱ ለረኪበ ኩሉ ምፍቅዱ፡ ምስለ ካልኡ ዐይንየ አሐዱ።

ሰላም ለማዕፀንኪ ለእግዚአብሔር ዘውጉ፡ ብዑድ ሥርዐቱ ወፍሉጥ ሕጉ፡ ማርያም ድንግል ለአስካለ ሕይወት ሐረጉ፡ በልኒ እግዝእትየ ኃጢአተከ ኅደጉ፡ ወመኃልየከ ስማየ አዕረጉ።